नेपाल नागरिक उड्डयन प्राधिकरण, त्रिभुवन अन्तर्राष्ट्रिय विमानस्थल नागरिक उड्डयन कार्यालयले विमानस्थलको आन्तरिक टर्मिनल भवनमा विदेशी मुद्रा विनिमय (सटही) खरिद सेवा सञ्चालन गर्न इच्छुक कम्पनीहरूबाट बोलपत्र आह्वान गरेको छ। ​कार्यालयको कर्पोरेट महाशाखाले २०८३ असोज १ (२०८३।०६।०१) गते दोस्रो पटक सार्वजनिक सूचना जारी गर्दै उक्त आय ठेक्का बन्दोबस्तका लागि प्रस्ताव मागेको हो। सूचनाअनुसार आन्तरिक टर्मिनल भवनको प्रस्थानतर्फ पुरानो स्टेरायल हलमा हाल खाली रहेको १६.९६ वर्ग मिटरको सटरमा यो सेवा सञ्चालन गरिनेछ। ​यस बोलपत्रमा सहभागी हुनका लागि सम्बन्धित निकायबाट विदेशी मुद्रा विनिमय कारोबार गर्न इजाजत प्राप्त गरेका संस्था, फर्म वा कम्पनीहरू मात्र योग्य हुनेछन्। पाँच वर्षको अवधिका लागि निर्धारण गरिएको यस ठेक्काको न्यूनतम बहाल रकम रु. १ करोड ३९ लाख ४ हजार ६ सय १० तोकिएको छ। ​इच्छुक बोलपत्रदाताले रु. ३,३९० दस्तुर तिरेर बोलपत्र खरिद गर्न सक्नेछन्। बोलपत्र खरिद गर्ने अन्तिम म्याद सूचना प्रकाशित भएको मितिले २१औं दिनको कार्यालय समयभित्र रहेको छ। त्यसैगरी, बोलपत्र दर्ता (दाखिला) गर्ने अन्तिम म्याद २२औं दिनको दिउँसो १२ बजेसम्म तोकिएको छ। दर्ता भएका बोलपत्रहरू सोही दिन दिउँसो २ बजे (१४:०० बजे) खोलिने कार्यालयले जनाएको छ। ​यससम्बन्धी विस्तृत जानकारी नेपाल नागरिक उड्डयन प्राधिकरणको वेबसाइट (www.caanepal.gov.np) र विमानस्थल कार्यालयको वेबसाइट (www.tiairport.com.np) मा राखिएको छ। थप जानकारीका लागि कार्यालयको फोन नम्बर ०१-४११३०३३ (एक्स्टेन्सन २४९७) मा समेत सम्पर्क गर्न सकिने जारी सूचनामा उल्लेख छ।

लोड हुँदैछ…