देशको मौसम प्रणालीमा आंशिक फेरबदल आएको छ। जल तथा मौसम विज्ञान विभाग, मौसम पूर्वानुमान महाशाखाले आज सार्वजनिक गरेको पछिल्लो विवरण अनुसार देशभर आज दिउँसो आंशिक बदली रहनेछ। महाशाखाका मौसमविद्हरूका अनुसार वायुमण्डलमा आएको यस खालको सामान्य परिवर्तनका कारण देशका हिमाली तथा पहाडी भू–भागका एक–दुई स्थानमा हल्का वर्षा र हिमपातको सम्भावना रहेको छ। यसैगरी, लुम्बिनी प्रदेशका तराई भू–भागका केही स्थानमा समेत हल्का वर्षा हुन सक्ने आकलन गरिएको छ। आज राति पनि हिमाली र पहाडी भू–भागमा मौसम आंशिक बदलीकै अवस्थामै रहने महाशाखाले जनाएको छ। तर, राति तथा बिहानको समयमा भने तराईका भू–भाग, उपत्यका तथा नदी किनारका खोँचहरूमा हुस्सु र कुहिरो लाग्ने क्रम बढेकाले जनजीवन प्रभावित बन्न सक्ने देखिएको छ। मौसममा आएको यो फेरबदल र विशेषगरी हिमाली क्षेत्रमा हुने हिमपात तथा तराईका क्षेत्रमा लाग्ने हुस्सुले यातायात, उडान तथा दैनिक जनजीवनमा आंशिक असर पार्न सक्ने भएकाले सम्बन्धित क्षेत्रका नागरिकहरूलाई आवश्यक सतर्कता तथा सावधानी अपनाउन महाशाखाले विशेष अनुरोध गरेको छ।